Landcare Research - Manaaki Whenua

Landcare-Research -Manaaki Whenua

FNZ 55 - Criconematina (Nematoda: Tylenchida) - Māori summary

Wouts, WM 2006. Criconematina (Nematoda: Tylenchida). Fauna of New Zealand 55, 232 pages.
( ISSN 0111-5383 (print), ; no. 55. ISBN (print) ). Published 24 Mar 2006
ZooBank: http://zoobank.org/References/088E84BD-3DE3-4EA2-B6D9-C45BBC0A12F1

Māori Summary

Ngā nematode Criconematina

Ko te noke rango (te noke tuna ki ētahi), he momo noke porotaka he wehenga kore tōna tinana – he mōkitokito anō hoki te nuinga. I te pori Nematoda, e rua ngā karangatanga, ko te Secernentea me te Adenophorea. Tērā tētahi rōpū o te karangatanga Secernentea (te rōpū nō reira mai te pūtoi whāiti Criconematina) ko Tylenchida te ingoa, me tētahi anō o te karangatanga Adenophorea ko Dorylaimida te ingoa, he pirinoa te mahi a ēnei rōpū. He whai wāhanga kamukai āhua mārō ēnei toke rango pirinoa. Mā te wāhanga kamukai mārō nei e taea ai e rātou ngā pūtau tipu te werowero, e toroa ai ngā painga o roto. I ngā Tylenchida (ngāi Tylenchina, ngāi Hoplolaimina, me ngāi Criconematina), ka hangaia ngā wāhanga kamukai nei ki ngā pūtau o te waha, ā, ka kīia he stomatostyle. I ngā Dorylaimida (ngāi Longidoridae me ngāi Trichodoridae), ka tipu mai ngā wāhanga kamukai i ngā pūtau o te pū kai, nō reira ka kīia he odontostyle. I tā rātou kaikai i ngā pakiaka o te tipu, tērā tonu ka takakinotia te tipu, engari ko tā rātou harihari wheori tipu tā rātou mahi kino e kaha ake ana te mōhiotia.

He maha ngā tylenchid ka takakino i ngā tipu ahuwhenua. He kaha ake tēnei raruraru i ngā māra kotahi anake te momo kai e tipu ana i roto. Ā, ina tere tonu, ina rite tonu te whakatō i tētahi momo tipu e pai ana ki a rātou, kātahi ka hē kē atu. Kai ai te Criconematina, arā te pūtoi whāiti o ngā tylench e whakaahuatia ana i tēnei tuhinga, i ngā pakiaka rākau, ā, ka whāiti mai ngā raruraru e hua ake ana i tēnei mahi a rātou ki ngā māra huarākau pakihi i muia ngā rākau e ēnei moroiti i mua i te whakatōkanga, ko te oneone rānei i muia. I ō rātou kāinga ake, me uaua ka raru he tipu i a rātou. O ngā momo e 68 e mōhiotia ana kei Aotearoa e noho ana, e 47 nō konei anake (e 46 nō te whānau whāiti Criconematinae). I te whānau Criconematidae, he maha ngā rārangi rere whakapae kei te kahuārai, ko te mōwhiti te āhua ki te titiro atu. I te whānau whāiti Criconematinae, he unahi, he tarakina rānei, ko ngā mea e rua rānei e mau mai ana ki ngā mōwhiti o ngā uwha, o ngā kōhungahunga, o rāua tahi rānei.

He hanga mōkitokito ngā Criconematid, nō reira hei āta tirotiro i ngā āhuatanga whāiti, me karu whakarahi pūhui kua meatia kia tino kaha tāna mahi, ā, me rumaki te arotahi ki te hinu i te tuatahi. Me ūta rokiroki ngā tautauira nei, arā, me whakamate ngā pūtau katoa ki te formaldehyde, kātahi ka kōkuhu atu i te glycerol, ka tāpae ai ki waenganui i ngā papa kōataata. He pūataata ngā Criconematid, nō reira ka whāia ko ngā āhuatanga whakawaho, whakaroto anō hoki o te tinana hei tautohu i tēnā momo, i tēnā. I roto i a ngāi Criconematina, he tino rerekē te āhua o te toa me te uwha. Ko ētahi āhuatanga e kitea ana i ngā uwha, kei te tino ngoikore, kei te ngaro rānei i ngā toa. Nō reira, e whāia ana ko ngā āhuatanga kei ngā uwha hei tautohu i ngā momo. Ko te āhuatanga whakaroto matua, ko te wāhanga kamukai. He pūreke kei te pūtake e pai ai te piri atu o ngā uaua e whakataki ana i ngā nekeneke o ngā wāhanga kamukai. Ko te roa o ngā wāhanga kamukai tae atu ki te rahi me te āhua o ngā pūreke ētahi tino āhuatanga ka āta tirohia hei tautohu i ia momo. Ko tētahi atu tino āhuatanga o roto ka tirohia, ko te āhua o te pū kai. Ko ētahi āhuatanga o waho, ko te roa, te whānui me te hanga o te noke rango. Arā anō te rahi me te maha o ngā mōwhiti o te kahuārai, te maha o ngā mōwhiti kei mua i te nono, te maha anō kei muri i te puta o te uwha. I ngā momo whai unahi, whai tarakina, ka whaihua anō pea te tatau i te maha me te roa o ēnei hanga ki ia mōwhiti. Mā te whakamahi whakaahua kua tangohia ki te karu whakarahi irahiko matawai e pai ai te whakaatu i ngā āhuatanga i te takiwā o ngā ngutu, te āhua o ngā unahi, me ōna anō tāpiritanga.

I Aotearoa nei, i tīmata ngā mahi tirotiro i te whakarōpūtanga o ngā noke rango i ngā tau tuatahi o ngā 1960. Ko ngā noke rango nekeneke anake i tirohia i te tīmatanga, engari i te takanga o te wā ka uru mai anō ngā noke pirinoa ki ngā tipu me ngā ngārara. Ko te whāinga o tēnei tuhinga i te wā i whakaarohia tuatahitia ai, kia whakarāpopotongia ngā rangahautanga katoa o ngāi Tylenchida, ka whakakotahi ai ki te tuhinga kotahi. Engari kāore i roa ka kitea he whānui rawa te hao o tēnei kupenga. Nō reira, kua aro whāiti te tuhinga nei ki a ngāi Criconematina. Hui katoa, e 68 ēnā momo, 16 kātahi anō ka mōhiotia i te ao pūtaiao.

Translated by: Hēni Jacob, Tāmaki-makau-rau / Auckland