Landcare Research - Manaaki Whenua

Landcare-Research -Manaaki Whenua

FNZ 51 - Coccidae males (Insecta: Hemiptera: Coccoidea) - Māori summary

Hodgson, CJ; Henderson, RC 2004. Coccidae (Insecta: Hemiptera: Coccoidea): adult males, pupae and prepupae of indigenous species. Fauna of New Zealand 51, 228 pages.
( ISSN 0111-5383 (print), ; no. 51. ISBN 0-478-09360-8 (print) ). Published 22 Jun 2004
ZooBank: http://zoobank.org/References/85A2C19D-CA28-4C43-9B7C-BABE3D5DFCE8

He Whakarāpopototanga

Ngā pepeke unahi mohe tāne

Ko te whānau unahi mohe Coccidae tētahi o ngā whānau pepeke unahi tekau o Aotearoa he ngote tipu tā rātou mahi. Ka āhua roa tonu ngā uwha pakeke e ora ana ki te mata o te whenua (ka kotahi marama, roa ake rānei), ā, koinei te tūātipu e kitea nuitia ana. Koinei anō i whakamahia nuitia ai te hanga pakeke hei tautuhi i ngā momo. He tino rerekē te āhua o ngā uwha i ngā toa - e 2, e 3 rānei ngā tūātipu punua, kātahi ka kounu, ka puta ko te hanga pakeke e āhua rite tonu ana ki tō te punua, engari he whai kiato kākano, ka āhei anō ki te whakaputa uri. Kāore he parirau o te uwha pakeke, he āhua poto anō ngā waewae me ngā pūhihi. Waihoki, kāore e tino mārama te kitea atu o ngā wehenga o te tinana, arā, o te upoko, te poho me te puku. Koinei te wā o tā rātou mataora e whai pānga ai ēnei pepeke ki te ōhanga. He mea whakaahua ā-kupu, ā-pikitia ngā uwha pakeke o ngā momo unahi mohe katoa e mōhiotia ana i Aotearoa e Hodgson & Henderson i tau 2000. I reira ka kōrerorerotia te koiora, te tītaringa, ngā hono ki ngā tipu e nohoia ana e ngā pepeke nei, ngā pirinoa, ngā hoariri me ngā pānga ohaoha.

Ko ngā toa pakeke o ngā unahi mohe katoa e mōhiotia ana i Aotearoa, he āhua rite te hanga ki te nuinga o ngā pepeke puta noa. Inā rā, he whai parirau (engari ko ngā parirau o mua anake e tino tika ana te hanga), he roa ngā waewae me ngā pūhihi, ā, he māmā noa iho te kite i ngā wehenga i waenga i te upoko, te poho me te puku. Heoi anō, kāore e kamu te waha, nō reira kotahi rā, e rua rā rānei te toa e ora ana ki tēnei ao. Nā konā i whāiti noa ake ai te mōhio ki ngā toa; ko te nuinga hoki kua rangahaua, he mea āta whakatipu ki rō taiwhanga pūtaiao. Ina tāpiria atu ngā kupu whakaahua i ngā toa o tēnei mahi rangahau nei ki ērā kua tuhia puta noa i te ao, kāore tonu e eke ki te 10% te rahi o ngā toa pakeke o ngā unahi mohe o te ao e mōhiotia ana.

He rerekē noa ake te mataora o te toa i te uwha. Ka nekeneke ngā toa i te tūātipu tuatahi, ā, he rite tō rātou hanga i tēnei wā ki tō ngā uwha. E rua, e rua, ka kīia he ngaoki i te tūātipu tuatahi. Ka kounu te toa, ka puta ko te tūātipu tuarua. Tērā pea ka nekeneke i te tīmatanga o tēnei tūātipu, engari kāore e roa ka tau te noho (tērā pea ka tatū ki tētahi tipu kē atu i tērā e nohoia ana e ngā uwha), he kai te mahi mō ētahi wiki. I tēnei tūātipu tuarua, ka tukuna e te toa he kiri kōataata hei whakakapi i a ia. E honoa ana te 'tēneti' nei ki te mea e nohoia ana e te pepeke ki tētahi momo hararē ka tukuna e ētahi pū i te paenga o te pepeke. Hei kahu pītongatonga tēnei mōna kia kore ai ia e pakapaka i te hau, e raru rānei i ētahi atu āhuatanga taiao i te wā e huri ana tōna āhua. Kātahi ko te tūātipu tuatoru e kīia ana ko te ngeti-tōmua. Ka noho te ngeti-tōmua nei ki raro i te kahu i hangaia rā i te tūātipu tuarua, kāore e kai. Ka mea ā, ka kounu te ngeti-tōmua, ka puta ko te ngeti, ā, kāore tonu te mea nei e kai. Kotahi anō te kounutanga, ka puta ko te mea pakeke, e tiakina tonutia ana e te kahu kōataata o te tūātipu tuarua. He rite te roa e pakeke haere ana te toa me te uwha, nō reira ka puta tahi ko ngā mea e rua ki te taiao.

I tēnei putanga o Te Aitanga Pepeke o Aotearoa , ka whakaahuatia te katoa o ngā toa pakeke, ngā ngeti me ngā ngeti-tōmua e mōhiotia ana o ngā pepeke unahi mohe māori o Aotearoa.

Translated by: Hēni Jacob, Levin