Landcare Research - Manaaki Whenua

Landcare-Research -Manaaki Whenua

FNZ 48 - Scaphidiinae (Insecta: Coleoptera: Staphylinidae) - Māori summary

Löbl, I; Leschen, RAB 2003. Scaphidiinae (Insecta: Coleoptera: Staphylinidae). Fauna of New Zealand 48, 94 pages.
( ISSN 0111-5383 (print), ; no. 48. ISBN 0-478-09353-5 (print) ). Published 18 Nov 2003
ZooBank: http://zoobank.org/References/FDA38B33-D656-46CB-9406-CA03D26DC811

He Whakarāpopototanga

Ngā Pītara Scaphidiine

Huri i te ao, kei te āhua 1400 ngā momo o te whānau-iti Scaphidiinae. Tae mai ki nā tata nei, tērā te pōhēhē he whānau wehe motuhake ēnei i ngā Staphylinidae (ngā pītara 'kaewa') Katoa ngā momo, he tinana ruarangi, he pango te nuinga, he mōhinuhinu anō. Engari kia āta tirohia, ka kitea ōna āhuatanga whāiti hei āwhina i te tangata ki te wehewehe i tēnā momo, i tēnā momo. He kai harore a ngāi scaphidiine, otirā, he motuhake te āhua o tā tēnā, o tā tēnā whakamahi i te harore e nohoia ana e ia. Kitea ai ētahi momo i ngā kōhanga o ētahi pōpokotea waihanga harore o āhia me āwherika. He hononga ō ētahi scaphidiine ki ngā pūhekaheka hāwareware (ngāi Myxomycetes) - he hanga āhua rite ēnei ki te amoeba i kīia he harore i mua atu, engari ko te tinana, he whai karihi maha, ā, ka manini haere i te mata o te oneone ki te kimi kai māna, ki te kimi wāhi pai rānei hei tuku i ana pua atua. Nā te āhua rerekē o te hanga o te tinana, ngā wāhanga tinana, me te koiora o ēnei momo kua noho koinei tētahi o ngā kāhui Staphylinidae whakamīharo tonu.

Kāore anō kia takoto he whakarōpūtanga pūmau mō ngā Scaphidiinae katoa puta noa i te ao. Heoi, he wāhi nui tonu kei ērā o Aotearoa, i te mea kei konei e noho ana ētahi o ngā momo onamata. Kia mārama ake ai tātou ki ngā momo o konei, kua tirohia anō te katoa o tēnei kāhui iti - e 21 ngā momo nō konei taketake ake, e 2 ngā rāwaho, ā, o roto i tērā, 15 ngā momo e kīia ana he momo hou. Kua takoto anō he ara tautohu, ā, kei ngā kupu wehewehe i ngā puninga ētahi kupu wehewehe anō i ngā torongū. Kua puta he whakarāpopototanga o ngā wāhi noho o ia momo, me ētahi atu kōrero koiora mō tēnā, mō tēnā. Kātahi anō a Cyparium ka kitea i Aotearoa nei, ā, e rua ōna momo hou. He mea nui tēnei i te mea nō tua whakarere tēnei puninga, arā tōna tino wāhi noho e mōhiotia ana ko ngā whenua pārūrū, ā, taka mai ki tēnei wā, ko Java anake te wāhi i tēnei pito o te ao kua kitea ia i reira. Ko ngā momo kei Aotearoa nei, he āhua rite tonu ki tētahi i āwherika ki te Tonga. Arā tētahi o ngā puninga tūturu o konei ko Brachynopus te ingoa, i whakaarohia kotahi anō tōna momo, engari ināianei kua kitea ētahi atu momo e toru. Kei te whakaahuatia anō hoki te puninga Notonewtonia me ōna momo e rua e mōhiotia ana. He mea rerekē ō te puninga nei, he hanga āhua rite ki te mārua i ngā taha o te wāhanga whakamua o te poho. E rua, e rua ēnei puninga, nō te iwi Scaphisomatini, ka mutu, nō tua whakarere. Ko ērā atu momo, nō ngā puninga horahora e kīia ana ko Baeocera me Scaphisoma . Tekau mā rua ngā momo i te puninga Baeocera (10 ngā momo hou), tae atu ki te momo Baeocera actuosa e kitea nuitia ana i ngā pūhekaheka hāwareware. Ko ia anake te scaphidiine kāore te wāhanga tuku kākano i te pito rawa o te pū tuku kākano - kei paku mua mai kē. E toru ngā momo o te puninga Scaphisoma - e rua nō konei tūturu, kotahi te rāwaho.

Kua marara te noho o ētahi momo ki hea, ki hea, ko ētahi anō e noho whāiti ana ki tōna anō rohe, pērā i tētahi kāhui momo Baeocera e noho ana ki ngā whenua i te uru-mā-raki o Whakatū, i Te Waipounamu. He haurua pea o ngā momo o Aotearoa, he ngoikore ngā parirau o muri mō te rere, he rere kore. Noho ai te nuinga ki te ngahere. Ko ngā tikanga kohikohi tino pai, ko te tātari i ngā rau popo, ko te āta hopu rānei ki te ringa tonu mai i te harore e nohoia ana e ia. Ko te Brachynopus latus te momo e kitea nuitia ana, he rere kore anō tērā. He māmā noa iho te kohikohi i a ia ki te rua māhanga, me tirotiro noa iho rānei a raro o ngā rākau pirau e tipuria ana ana e te harore. Ko ngā momo me uaua ka kitea, pērā i ngā uri o Cyparium , me Notonewtonia , he tohu pea o ētahi kāinga whāiti o te taiao kua mōrearea, kua onge rānei.

Translated by: Hēni Jacob, Huatau Consultants, Levin