Landcare Research - Manaaki Whenua

Landcare-Research -Manaaki Whenua

FNZ 38 - Barker, G. M. 1999 Naturalised terrestrial Stylommatophora (Mollusca: Gastropoda) - Māori Summary

Barker, GM 1999. Naturalised terrestrial Stylommatophora (Mollusca: Gastropoda). Fauna of New Zealand 38, 253 pages.
( ISSN 0111-5383 (print), ; no. 38. ISBN 0-478-09322-5 (print) ). Published 25 Jan 1999
ZooBank: http://zoobank.org/References/1EDCB01F-3A59-4C15-AAF8-8A160A29A2B9

He Whakapotonga ma te Marea

Ko tēnei mea, te wae-uaua, arā, te 'gastropod', he rōpū whānui tonu nō te karangatanga e kīia nei he 'hanga-mohe'. Arā ngā tino tauira o te wae-uaua, ko te ngata me te pūtoko. Ko te nuinga, ka noho ki te moana, engari arā anō ētahi ko ngā wai māori, ko te whenua tonu rānei tō rātou kāinga noho. O ngā hanga-mohe e noho ana ki uta, e whakapaetia ana kei te āhua 35 000 ngā momo, huri i te ao. ā, ko ō Aotearoa taketake ake tētahi o ngā huinga huhua noa, inā hoki, e whakapaetia ana ko tōna 1350 ngā momo hanga-mohe ko Aotearoa tō rātou kāinga tūturu. Heoi anō, o ngā whānau hanga-mohe āhua 71-92 nei, puta noa i te ao, 11 noa iho nō Aotearoa, taketake ake.

Nā ngā mahi a te tangata, kua tae atu ētahi wae-uaua noho whenua ki ētahi wāhi o te ao i tua atu i ō rātou kāinga ake, ā, kua rarau tā rātou noho i reira. I ētahi wā kua riro ngā mea nei hei hoariri i ō rātou kāinga hou, i te mea nā rātou kua hē pea te tipu o ngā māra kai, kua rere rānei ētahi mate pirinoa i a rātou, kua tau ki runga i te tangata, i ā rātou kararehe rānei, tērā rānei kua patua, kua tāmia e rātou ngā kararehe me ngā tipu māori o ō rātou kāinga hou.

E 29 ngā momo wae-uaua noho whenua o wāhi kē kua tau tā rātou noho i Aotearoa, nō ngā whānau tekau mā rima. I takea mai ēnei momo i ūropi, i Amerika ki te Raki, i Te Moana-nui-a-Kiwa rānei, ā, tērā pea i tau atu ētahi ki whenua kē i te tuatahi, ka noho āhua 'tangata whenua' mai i reira, kātahi ka kawea mai ki Aotearoa. Ko ngā momo kua rarau tā rātou noho i Aotearoa, e kaha noho an a Ingāmāra me ngā mahinga ahuwhenua a te tangata, otirā, ko ērā e rite ana ngā kai o roto ki ērā o ō rātou wā kāinga. ā, nā te piri tahi ki ngā tipu, kua kawea haeretia ngā wae-uaua nei e te tangata ki ngā tōpito o te ao tauhokohoko. Nā te tere rarau o te noho a ētahi i muri tonu i te taenga mai o te Pākehā ki konei, ka pōhēhē ngā kaimātai kararehe o ērā wā nō Aotearoa tūturu aua nanakia rā.

Ko te tinana o te nuinga o ngā wae-uaua noho ki uta, he koeko te hanga o te wāhi kei reira ngā whēkau, ā, e takoto raungaiti mai ana, pēnei i te pītau nei, ki roto i tētahi anga. Arā anō te 'ūpoko-waewae'. Ki te titiro atu koe ki te mea nei, ko te wae-uaua kei raro iho. Mā te wae-uaua, ka taea e te mea nei te nekeneke haere. Kei mua i tēnei wāhanga, ko te waha me ngā weri e whā e noho takirua mai ana. Ko tēnei hanga-mohe e whakamāramatia ake nei, ko ia anō te ngata e mōhio nei tātou katoa. Ka taea anō e te ūpoko-waewae te hoki ki roto i te anga kia kore ai ia e pakoko noa, e kainga rānei e te hoariri. Ko te āhua o te anga, ko te hanga whakawaho o te ngata, me te hanga whakaroto o te ūpoko-waewae, koinei katoa ngā mea ka āta tirohia e whakatauhia ai ngā rerekētanga i waenganui i tēnā, i tēnā momo ngata. O ngā kararehe manene katoa kua pūmau tā rātou noho i Aotearoa, 15 ngā momo ngata.

I ngā takiwā o te ao e kaha tonu ana te hauwai me te pūmahana, kua kore i tino hiahiatia te anga hei whakamarumaru i ngā hanga-mohe e noho ana i reira, ā, i roto i ngā tau mano tini, kua iti ake ngā anga o ētahi. Ki te tirohia ētahi momo wae-uaua kua tīmata tā rātou takahi i tēnei huarahi, ka kitea e waha tonu ana rātou i ō rātou anga, engari kua kore e taea te uru katoa atu ki roto i taua anga hei ārai atu i ngā kino. Ko ngā wae-uaua pēnei, ka kīia ki te reo Ingarihi he 'hāwhe-pūtoko', arā, kei waenga i te ngata me te pūtoko. O ngā momo wae-uaua o tāwāhi kua tatū tā rātou noho i Aotearoa, kotahi anake e pēnei ana te āhua.

Ko ngā mea kua roa tonu e takahi ana i te huarahi e ngaro atu ai ō rātou anga, tērā pea he papa hangariki noa iho te anga, tērā rānei kua noho noa mai ētahi kongakonga o te anga ki roto i te kiko o te ūpoko-waewae, tērā tonu rānei kua kore katoa. Ki te pēnei te āhua, kua kīia he pūtoko, engari he ngata tonu kē, heoi anō te rerekētanga, kua iti noa ake te anga, kua kore katoa rānei. Hei whakatau i ngā rerekētanga i waenganui i ēnei momo wae-uaua, me āta titiro ki te hanga whakawaho, tae atu ki te hanga whakaroto o te ūpoko-waewae. Tekau mā whā ngā momo pūtoko kua āhua tangata whenua tā rātou noho i Aotearoa i roto i ngā tau.

He Kupu āwhina -- Glossary

aromatawai i ngā huhua a Tāne — biodiversity assessment (land-based)
hanga-mohe — soft-bodied > mollusc
koiora-matawhenua — biogeography
pūtoko — slug
pakoko — desiccated
papa hangariki — small plate
pītau — circinate frond of a fern > spiral
ringa hangarau — technician
tikanga nanati i ngā kararehe takakino — pest management
weri — tentacle
wae-uaua — muscular foot, gastropod

Translation by:H. Jacob, Huatau Consultants, Wellington