Landcare Research - Manaaki Whenua

Landcare-Research -Manaaki Whenua

FNZ 26 - Tenebrionidae (Insecta: Coleoptera) - Māori summary

Watt, JC 1992. Tenebrionidae (Insecta: Coleoptera): catalogue of types and keys to taxa. Fauna of New Zealand 26, 70 pages.
( ISSN 0111-5383 (print), ; no. 26. ISBN 0-477-02639-7 (print) ). Published 13 Jul 1992
ZooBank: http://zoobank.org/References/C9E3D890-3A33-40BA-AEAC-781DD427620B

He whakapotonga ma te marea

He tino maha nga Tenebrionidae, araa, nga piitara poouriuri. He mano tini nga whaamere-iti i roto i te ao. E tata ana ki te 150 nga whaamere-iti i Niu Tiireni nei, aa, e peenei ana ki te maha o nga whaamere-iti i nga moutere o Ingarangi me Airani.

He piitara nui, kaaore e taaea te rere, te nuinga o nga Tenebrionidae. Engari, he mea nohinohi eetahi whaamere-iti e noho ana i roto i nga raakau popo me nga kai. Ko te nuinga e noho ana i roto i te one, kei raro i nga poro raakau, kei roto raanei i nga otaota rau. Ka kai raatou i nga mea ora katoa kua mate. Ko teetahi o nga whaamere o Niu Tiireni ka kai poo i nga hawahawa o runga raakau.

Ko eetahi whaamere-iti e mui ana i roto i nga kai i e kiia ana he 'piitara paraaoa'; ko nga iroiro o eetahi e kiia ana 'toke paraaoa'. He ngaawari te whakatupu i nga toke paraaoa, no reira he kai pai eenei me nga kararehe e whaangaiahereheretia ana.

Ka moohio koe ki nga piitara poouriuri ki nga tohu e rua: kua uhia te puu o nga puuhihi e teetahi whata e kiia ana he 'canthus'. Ko te toru tuatahi o nga pereti e uhi ana a raro o te puku ('sternites') kua mau puu, kaaore e nekeneke ana. He pango, he paakaakaa raanei te kara; engari he aahua maa eetahi e noho ana i runga i nga one tea. Ko eetahi, he moohinuhinu te aahua.

E noho ana i Niu Tiireni anake te nuinga o nga piitara poouriuri e kitea ana i konei; he ruarua noa iho kua tae noa mai i raawahi. He mea haere poo te nuinga, haaunga nga whaamere-iti noho one tai. Heoi, he maha nga Tenebrionidae o raawahi he mea haere ao.

He mimi kino too eetahi Tenebrionidae, no reira he kawa ki nga mea e hiakai ana i a raatou. Ka paarikorikoa to kiri mehemea ka tangotangohia nga piitara e ora ana.

Ka taaea e nga Tenebrionidae te mau wai i roto i te tinana; no reira ka aahei te noho i roto i nga waahi maroke e mate ai te nuinga o nga piitara. Heoi anoo, he maha nga Tenebrionidae o Niu Tiireni nei e noho ana i nga waahi maakuukuu. He pai eenei hei tohu i te pai, i te kino raanei o te waahi e nohoia ai; mehemea kei reira raatou e moohiotia ana kua kore taua waahi i takahia e te nuinga o te tangata, kararehe raanei.

Kei te tautohe tonu te whanaungatanga o Tenebrionidae ki eetahi iwi piitara, engari he whanaunga tata nga Archaeocrypticidae me nga Chalcodryidae. Ko te aahua, kei Aahitereiria nga whanaunga tata o nga Tenebrionidae o Aotearoa nei, ko nga iwi e kiia ana Adeliini me Helaeini.

Translation by: UniServices Translation Centre, Auckland