Landcare Research - Manaaki Whenua

Landcare-Research -Manaaki Whenua

FNZ 24 - Therevidae (Insecta: Diptera) - Māori summary

Lyneborg, L 1992. Therevidae (Insecta: Diptera). Fauna of New Zealand 24, 140 pages.
( ISSN 0111-5383 (print), ; no. 24. ISBN 0-477-02632-X (print) ). Published 04 Mar 1992
ZooBank: http://zoobank.org/References/7D4AAC2F-32F3-4A36-883F-38834FFD9B3E

He whakapotonga ma te marea

E noho ana nga Therevidae, araa nga ngaro-oka i runga i nga whenua katoa o te ao. He tini nga tuumomo Therevidae i teetahi, i teetahi takiwaa-kararehe nui o te ao. Ko te nuinga pea kei roto i te takiwaa o Ahitereiria me nga whenua o Te Moananui-a-Kiwa. E ono rau pea te kaute o nga tuumomo [species] i taua takiwaa. E iti iho i te koata o aua tuumomo Therevidae kua aata koorerotia te aahua.

Ahakoa he whenua iti, he maha nga tuumomo Therevidae i Niu Tiireni nei. Teeraa pea ka tae ki te kotahi rau tuumomo aa te waa ka aata koorerotia ai. He taurite teenei ki te tuumomo toopuu kei roto o Oropi katoa. I teenei waa, e ono tekau maa iwa nga tuumomo ngaro-oka kua oti nga aahua te whakaatu, te whakaingoa hoki. Na runga i teenei whakahooutanga i te whaamere, ka kitea tuatahitia, ka aata whakaaturia te aahua, ka whakaingoatia ai hoki, e rima tekau maa rua o nga tuumomo.

Kua whaona nga tuumomo e ono tekau maa iwa nei ki nga hapuu [genera] e toru. Ko Anabarynchus te mea nui rawa o eenei hapuu; e ono tekau maa rua oona tuumomo. Ko Megathereva teetahi hapuu hoou kua hangaa hei nohoanga mo nga tuumomo e toru; ka whaakanohoia hoki nga tuumomo e whaa atu ki roto i Ectinorhynchus, teetahi hapuu e whakawhanaunga ana ki eetahi ngaro-oka o Aahitereiria.

He ngaro nga Therevidae, e rima mirimita tae atu ki te tekau maa waru mirimita te roa o nga pakeke; ko te nuinga o raatou he puuhuruhuru te puku. E noho ana raatou i nga kaainga maha, engari kaaore e tino kitea ana. Ko te one-tai, ko nga mooheuheu o te aakau, ko nga taha puu-oneone o nga roto, o nga takere awa, koia na nga kaainga e paingia ana. E nohoia ana hoki nga waahi maakuukuu.

Kua tangohia nga pakeke i te marama o Hepetema tae atu ki Aaperira, engari ko te raumati, ko nga marama o Noema tae atu ki Pepuere te waa e tino kitea ai nga ngaarara nei.

Ko te tamariki he ngaarara toohihi e noho ana i roto i nga onepuu, i nga one punga raanei. He kakama te haere, aa, he nanakia hoki ki te kai i eetahi ngaarara, toke hoki. Ko te aahua e rua tekau nga waahanga e waru o te puku. I mua i te whakarerekeetanga hei tuungoungou ka huupeke te tinana peenei me te U. Kotahi te wiki, e rua raanei te oranga o te tuungoungou. I teenei waa ko oona mate he maroke, he patunga e te hoariri.

Ko te hiahia kia tupu ai te maatauranga e paa ana ki te aahuatanga me te oranga o nga Therevidae o Niu Tiireni.

PAANUI MO NGA KAI-KOHIKOHI

Ka taaea nga pakeke te kapo ki te kupenga tahitahi, ki te tuumomo taawhiti raanei e kiia ana he Malaise trap. Me whakamaroke, me pini hoki kia maatakitaki ai; meenaa ka maakuu ka kino ai nga huruhuru whakairoiro i runga i te tinana. Na aua huruhuru pea ka kitea ai ko teewhea tuumomo ngaro. Ma te taatari ki te kupenga taatari e rua tekau oona mata ka taaea nga iro me nga tuungoungou te hopu. Me taatari te rima ki te waru henemita o te oneone, aa, ka mau nga iro nunui me nga tuungoungou i roto i te taatari; ka kitea ai nga iro pakupaku hoki i runga i te oneone i taataritia ai. Kia mau takitahi nga iro i roo ngongo kei kai teetahi i teetahi.

Translation by: UniServices Translation Centre, Auckland