Landcare Research - Manaaki Whenua

Landcare-Research -Manaaki Whenua

FNZ 22 - Notonemouridae (Insecta: Plecoptera) - Māori summary

McLellan, ID 1991. Notonemouridae (Insecta: Plecoptera). Fauna of New Zealand 22, 64 pages.
( ISSN 0111-5383 (print), ; no. 22. ISBN 0-477-02518-8 (print) ). Published 27 May 1991
ZooBank: http://zoobank.org/References/48ECABF6-EE7D-49C5-98FF-192AE89A4564

He whakapotonga ma te marea

Ko te Notonemouridae teetahi o nga whaamere e whaa o nga ngaro-koowhatu e kitea ana i Niu Tiireni nei. Ko nga punua (he aahua ngaarara) e noho ana i roto i te wai māori, araa i roto i nga awa ririki, i nga wai e rere ana i raro kirikiri raanei.

Erua, e toru pea nga whakamaaunutanga kiri a te punua; ko te pakeke he koowariwari te tinana, e whaa oona parirau. E torutoru wiki noa iho te oranga; ka kai i te raakau i mua i te ainga, i te whakaputanga heeki. Kei eetahi o nga uwha he mea roa, peenei me te ngira, to raatou mea whakatakoto heeki. Ko teenei mea kaaore e kitea ana i eetahi atu whaamere ngaro koowhatu.

Kaaore e peenei nga tuumomo ngaro koowhatu e rua tekau maa ono o Niu Tiireni me nga ngaro koowhatu o eetahi whaamere; he iti, aa, kaaore e aata kitea ana. No reira, kaaore raatou e tino moohiotia ana, aa, kaaore oo ratou ingoa Māori.

Ko te punua kaikai o teetahi whaamere-iti te mea e tino kitea ana, no te mea e noho ana i roto i nga awa me nga wai e torohia ana e te tangata e maatakitaki ana i nga waahi hii ika, e nga taangata hoki e aata titiro ana i te hauora o te whenua. Ko nga pakeke o teetahi whaamere-iti e kohikohia ana, e paatata ana ki nga awa peenei, engari, kaaore e tino kitea ana, i te mea kei raro tonu i nga kirikiri i roto i te wai te nohoanga. Ko eetahi Notonemouridae kaaore e tino kitea ana, na te mea kaaore anoo kia aata maatakitakina te waahi e noho nei raatou. Hei tauira, ko te punua o teetahi whaamere-iti e kitea ana i nga wai e puta mai ana i nga punawai i roto i te ngaaherehere.

Kua piki haere te maatauranga e paa ana ki te Notonemouridae i nga tau toru tekau kua pahure nei, aa, kua paa tenei maatauranga ki te waahanga maatauranga e kiia ana applied entomology . Kua paanuitia nga ngaro koowhatu me to raatou mahi i runga i te whenua. E maha nga paanuitinga i roto i nga pukapuka o taawaahi e whakaatu ana raatou maahi tohutohu i te pai, i te kino raanei o te wai o nga awa me nga punawai. Inaaianei, i te mea kua ngaawari te moohio ko teewhea, ko teewhea o raatou, ka meinga peenei raatou i Aotearoa nei.

He kai na nga ika māori, na nga ika kuhu mai hoki, nga Notonemouridae . No reira ka mahia peeneitia ai nga ngaro paataritari o nga kai-hii taraute.

Mo eetahi ngaro koowhatu, ma te mata tangata e kite ko teewhea whaamere-iti toona; heoi, mo te nuinga, ma te maikara koroapu e titiro ki te parirau, ki te tinana, ki te waewae, ki te teke, ure raanei, aa, kaatahi anoo ka kitea ai ko teewhea whaamere-iti. Teeraa pea ka kitea he whaamere-iti hoou kei nga waahi kaaore anoo kia haerea nuitia e nga tohunga kai-kohikohi ngaarara.

Translated by: UniServices Translation Centre, Auckland