He pai, he kino rānei?
E mārama ana he aha ētahi o tātou i mataku ai i te pepeke, i te ngārara. Engari kei wareware tātou, o ngā momo pepeke e hia mano nei huri i te ao, he tino iti te ōrau he hua kino ōna ki te tangata. Kitea ai ngā pepeke i ngā momo wāhi katoa, hāunga anō te waitai. Heoi anō, kāore te nuinga e whai pānga nui ana ki te tangata – ki te waiho noa iho kia mahi i tā rātou mahi, ka haumaru tonu koe.
Ngā hua kino: NGĀ PEPEKE KINO
- Ka whakakino i ngā māra (hei tauira, ētahi aphid, ētahi anuhe), i ngā kai (hei tauira, ngā wīwhara), i ngā kākahu (hei tauira, te pūrēhua noho kākahu), i ngā whare (hei tauira, te kaiwiri)
- Ka whakararu i te tangata, i te kararehe – ngā ngaunga, ngā weronga, te kiri mangeo, te mate pāwera, te ngongo toto, te kawe mate, e raru ai te tangata me te kararehe (hei tauira, ngā pī, ngā katipō ‘wapu’ nei, ngā waeroa, ngā ngaro, ētahi pūngāwerewere, ngā ngārara noho moenga, ngā puruhi, ngā kutu)
- Ka whakapōrearea – te haunga, te tīwekaweka, te paruparu, te hoihoi, ngā para me ngā māwhaiwhai i roto i te kai, te whakakino i ngā tipu o te māra (hei tauira, te papata, ngā whare pūngāwerewere, ngā kihikihi, ngā pihareinga, ngā anuhe)
Ngā hua pai: NGĀ PEPEKE PAI
- Ka hangarua – ka wāwāhi i ngā tipu me ngā mea oreore kua mate (hei tauira, ngā pītara, ngā ngaro, ngā anuhe)
- Ka noho hei kai mā ngā manu, mā ngā mokomoko, mā ngā pekapeka, me ētahi atu
- Ka here i te horapa o ngā taru me ngā pepeke kino (hei tauira, ngā ngoikura, ngā ngaro, ngā wapu pirinoa moroiti)
- Ka ruirui i te hae (hei tauira, ngā wīwhara, ngā pūrēhua, ngā pī)
- Ka hanga hīraka (ngā anuhe pūrēhua hīraka)
- Ka hanga miere (hei tauira, ngā pī miere)
- Ka noho hei kai mā te tangata (ngā torongū a te wīwhara noho palm, ngā torongū witchety)
- Ka pai tonu hei āta tirotiro, hei whakamīharo mā te tangata (te katoa!)
