Ngā mahi whakataki
E kore e taea ngā pepeke katoa e kitea nuitia ana i tētahi takiwā te patu kia mate, i te mea ka toro mai anō mai i ngā whenua e pātata ana. Engari e taea ana te tātāmi te maha i tōu ake kāinga, i tāu ake māra.
Anei ētahi whakaaro mō te here i te maha o ngā pepeke kino:
- Whakakorehia ngā wāhi e kai ai, e whakaputa uri ai ngā pepeke nei. Porowhiua ngā putunga toenga kai me ērā atu tūmomo para. Kia tere te horoi i ngā waireka kua maringi. Tukua ngā wai o ngā takotoranga wai tērā e whakaputa uri ai ngā waeroa. Tirohia ngā kōrere kua puru, ngā hoeha i raro i ngā tipu noho ipu, ngā taea rapa tawhito, me ērā momo wāhi katoa e takoto noa ai te wai.
- Me whai kia hauhau tonu ngā whare me ngā rūma, kia kore ai e haukū, e takawai, kia kore ai e paingia e ētahi pepeke.
- Kia auau te whakahou i ngā putunga kai.
- Whakamahia he hanga whakararu pepeke, pērā i te camphor, i te ‘poro pūrēhua’, i te pani pare pepeke i runga i te kiri, i te amiami kakara kaha.
- Whakatakotoria he māunu patu pepeke.
- Whakamahia te wairehu me te paura patu pepeke. Ka kaha tonu te wairehu permethrin i runga i ngā mata mārō mō ētahi wiki nei. Heoi ānō, āta pānuitia ngā tohutohu.
- Kimihia ngā kōhanga kei reira ngā kāhui pepeke (pērā i ngā wāpu, i ngā pī me ngā pōpokorua) e noho tahi ana.
Hei patu i ngā pepeke me ngā pūngāwerewere kua mau ki tētahi momo raunga, i runga i te whai kia kaua rātou e rongo kino i te mamae, raua atu ki te pouaka tio mō ētahi rā.
Mō ngā muinga kino, me whakapā atu ki tētahi kamupene patu pepeke. Ka whaihua ake ā rātou mahi mēnā ka āta mōhio rātou he aha tā rātou e patu rā.
