Ngā ngau me ngā wero
He hanga hauwarea noa te nuinga o ngā ngau me ngā wero a ngāi pepeke mā. Heoi anō, tērā tonu ka mamae, ka pupuhi, me te mangeo anō, mō ētahi rā nei.
Ngā Mahi Whakaora Whānui
- Mēnā kei waho koe, e neke ki tētahi wāhi haumaru ake.
- Horoia te wāhi i werohia/ngaua, ka whakapiri atu i te pēke tio hei whakamauru i te mamae, hei whakapōturi anō i te toro haere o te paitini.
- Mēnā he wero nā te pīi, āta tahia mai te wero i te kiri, ā, mēnā e mau tonu ana te pēke paitini, me whai kia kaua e pahū mai te paitini i te pēke.
- Haere ki te tākuta, ki te hōhipera rānei mēnā e tino kaha ana te pākia e te mate, pērā i te toro whānui o te pupuhi (e tino hāngai ana tēnei ki te pupuhitanga i te kanohi me te kakī), i te ngāngā, i te ānini, i te heke rānei o te pēhanga toto.
Ko ētahi āhuatanga e rua tērā e mate ai te tangata, ko te ngau a te pūngāwerewere taoke, me te mate pāwera kino o te tangata ki te ngaunga, ki te weronga rānei. Ki te pā tētahi o ēnei, me haere rawa ki te tākuta, ki te hōhipera rānei. Ko ngā kōhungahunga me ngā kaumātua ngā hunga e tino noho mōrearea ana i tēnei āhua.
Ko te katipō me tana uri tata o Ahitereiria, a tuarā-whero, kua rarau nei tana noho ki ētahi wāhi o Aotearoa, ko rāua anahe ngā pūngāwerewere tāoke i Aotearoa. Heoi, e wātea ana he ‘patu-tāoke’ mō ēnei ngau pūngāwerewere i ngā hōhipera me ngā whare hauora. Mēnā ka taea, hopukina te pungāwerewere nāna koe i ngau, kia taea ai ia te tautohu. Mō ngā tau e hia nei, kua kore he tangata e mate i te ngau a te pūngāwerewere i Aotearoa nei.
Heoi, he rerekē te pāwera o tēnā, o tēnā tangata ki ngā ngau me ngā wero. Mō ngā tāngata e mate pāwera ana ki te wero a te pī, a te katipō (arā, te katipō ‘wāpu’ nei) rānei, tērā tonu rātou ka hemo, ka tata rānei te hemo, i ēnei āhuatanga. Tērā ka mau pēke ohorere, ka mau kōmore tautohu mate anō tēnei hunga. He tokomaha ngā tāngata ka hemo i Aotearoa i ia tau i te mate pāwera ki te wero a te pī, a te wāpu rānei.
