Landcare Research - Manaaki Whenua

Landcare-Research -Manaaki Whenua

Fauna of New Zealand 72: Micropterigidae (Insecta: Lepidoptera) - Popular summary: Māori

Gibbs, G W 2014. Fauna of New Zealand. 72, 127 pages.
(ISSN 0111-5383 (print), ISSN 1179-7193 (online); no. 72. ISBN 978-0-478-34759-3 (print), ISBN 978-0-478-34760-9 (online)). Published 30 Jun 2014
ZooBank: http://zoobank.org/References/D6BC8C34-6D93-4EC7-BCB3-5670B2CFE744
DOI: 10.7931/J2/FNZ.72

Māori summary — He Whakarāpopototanga

Ngā ‘pūrerehua-kauae’

Ka noho ko ngā ‘pūrerehua-kauae’ o te whānau Micropterigidae hei puna mōhiotanga mō tātou ina whaiwhai tātou i te hekenga ā-whakapapa mai o ngā pūrerehua me ngā pēpepe (Lepidoptera). Te take ka noho ēnei momo pūrerehua hei whirinakitanga mō ngā rangahau, ko te tawhito tonu, me kī ko ēnei ngā tuatahitanga o te whānau Lepidoptera.

Tata ki te katoa o ngā mātātoka toitū kua kitea i ngā takiwā pēnei te Moana Baltic, i Pēma, me Repanona ka tohu kua eke ēnei pūrerehua ki te taumata o te hekenga me te huringa āhua i mua i te mutunga o te wā Jurassic (140 manomano tau ki muri – te wā o ngā mokoweri) ā, kei te noho tonu mai ki tēnei ao, i ōna tōpito katoa, me te tata ki te kore rerekētanga. He kauae taketake tō ngā pūrerehua-kauae o nāianei, rite tonu ki te tini o ngā karangatanga aitanga-pepeke (nō reira mai hoki te ingoa). Tēnā ko tēnei, i roto i ngā tau kua whanake mai he arero korukoru mō ngā pūrerehua me ngā pēpepe tiketike, e āhei ai rātou te kai i te waihonga o ngā tipu whaipua (ngā Angiosperm). Nā konei i kaha ai ki te whai i tēnei kai homai kaha, mai i ngā tipu rere noa o te ao. He ahurei katoa ngā torongū Micropterigid, me kī, nā te tino rerekē rawa o ēnei i ngā anuhe e mōhiotia nuitia ana mō ētahi atu pūrerehua, kāore anō ngā kaimātai-pepeke kia tautohu i te momo pepeke e tika ana hei karangatanga mōna. Ka kai te nuinga o ngā anuhe pūrerehua-kauae o Aotearoa, hāunga anō tētahi, i te raurenga-torotoro.

Kīa ai ngā pūrerehua micropterigid ko tētahi o ngā taonga puiaki o te ao pepeke. Ko te nui o te whāronatanga parirau kei waenga i te 5 ki te 12 mm, ā, ka ngahae ngā parirau kia uraura kia waiporoporo rānei, ina tītakataka ēnei pūrerehua i waenga i ngā mauku, i ngā mauwhā, i ngā tākahikahi i te taha o ngā ara hīkoi, i ngā huarahi i te ngahere, i te taha hoki o ngā waerenga ngahere. Ka mōhiotia ēnei nā te tae maitai, me te āhua-tēneti o ngā pariraru i runga anō i te tinana. Ko ngā hihi kāore i tino rite te tūpoupou, te tōtahi rānei, ā, he tino pūhuruhuru katoa te pane me te puku. “Ka taea te nuinga o ngā momo o Aotearoa te tautohu nā te āhua o ngā tauira tae.”

Translation by Piripi Walker Whakatiki