Landcare Research - Manaaki Whenua

Landcare-Research -Manaaki Whenua

FNZ 47 - Erotylidae (Insecta: Coleoptera: Cucujoidea) - Māori summary

Leschen, RAB 2003. Erotylidae (Insecta: Coleoptera: Cucujoidea): phylogeny and review. Fauna of New Zealand 47, 108 pages.
(ISSN 0111-5383 (print); no. 47. ISBN 0-478-09350-0 (print)). Published 05 Jun 2003
ZooBank: http://zoobank.org/References/F7BD20B2-D210-4D51-9CB2-1BC51DF75F2C

He whakarāpopototanga

Ngā Pītara Erotylid

Kei te āhua 3500 ngā momo o te whānau Erotylidae (kua uru mai ngā Languriidae ki tēnei tatauranga) puta noa i te ao. Heoi anō, he tokoiti noa te hunga rangahau i te whānau nei, i te mea he pakupaku, he parauri te tae, ā, ki ētahi, he anuanu anō ki te titiro atu. Engari ahakoa kei te tika pea tēnei kōrero mō te nuinga, kāore e tika ana mō te katoa. He maha hoki ngā momo kai tipu (ngāi Languriinae) me ngā momo kai harore (ngāi Erotylini) he rahi tonu te hanga, he ātaahua, he māmā anō ki te kohikohi, ki te tautohu. Ko te āhua o te kunenga mai te take kāore a Aotearoa e nohoia ana e ngā momo rahi ake. Arā nē, i wehe mai a Aotearoa i Te Uri Māroa i mua i te kunenga mai o ngā momo rahi ake.

E aro ana tētahi wāhanga o tēnei tuhinga ki te hanganga o tētahi pūnaha whakarōpū mō ngā erotylid huri i te ao. Mā ngā whakarōpūtanga koiora ka takoto he pūnaha tohutoro māori e whakaatu ana kei hea ake o te ao koiora tēnā me tēnā momo, ā, ko wai mā ngā uri tata, e taea ai e ngā tohunga pūtaiao me te hunga tūmatanui te whakawhiti kōrero mō ngā aitanga a Tāne. I te nuinga o te wā, ka noho ko ngā 'rākau whakapapa' hei tāhuhu mō te pūnaha whakapapa, e māmā ai te whakaahua pēhea te kunenga mai o ngā uri maha. He mea tino nui kia mōhiotia te tūranga o ngā momo Erotylidae o Aotearoa i roto i tēnei whakapapa hou, i te mea mā reira e mōhiotia ai tō rātou pūtakenga mai, me ō rātou hononga ki ētahi atu erotylid.

E 9 noa iho ngā momo erotylid e kitea ana i Aotearoa, ā, koirā ngā mea e āta tirohia ana i konei. Ko ērā atu momo o te iwi Erotylini (ngāi Thallis me ngāi Cryptodacne), kei te kōrerotia i wāhi kē. He māmā te wehewehe i tēnei o ngā whānau i ētahi atu rōpū, engari me whakamahi rawa he karu whakarahi hei wehewehe i ēnei momo mai i ētahi whānau āhua rite te hanga, pērā i ngā Cryptophagidae. Heoi, he āwhina kei ngā ara tautohu e mau mai ana ki te tuhinga nei. Kāore e pērā rawa te uaua o te tautohu i ngā momo. He whai tauira kano ētahi e mārama ana te kitea atu, pērā i ngā Loberus me ngā Cathartocryptus, e māmā ai te tautohu i a rātou.

Ko te mea rerekē o ngā momo o Aotearoa, he whai hononga ā-whānau rātou ki ērā atu pītara erotylid i ngā tōpito katoa o te ao. Arā ngā momo maha he hononga tata a ō rātou ki ngā momo o Ahitereiria. o New Caledonia, o Amerika ki te Tonga, tae atu ki Āwherika ki te Tonga. Arā tētahi puninga korokē o Aotearoa, ko Loberonotha te ingoa, tērā pea he hononga ōna ki ngā rōpū e kitea ana i Üropi ki te Raki; heoi anō, he rehurehu te āhua o te hononga - me haere tonu he rangahautanga e mārama ake ai.

He rerekē te āhua o te kai a tēnā, a tēnā o te whānau Erotylidae, ā, e whakaataria ana tēnei āhua i ngā momo o Aotearoa. He kai harore te Cathartocryptus, te Cryptodacne, me te Thallis. He kai tipu te Loberonotha, otirā, ko te hae anake pea tāna kai. Ko ērā atu momo, ka hamuhamu noa i ngā tipu me ngā harore kua mate. He ripoinga whāiti ō ētahi, hei tauira, kitea nuitia ai a Loberus depressus i te tī, i te wāhi e hono ana ngā rau ki te kahiwi. Waihoki, ko ngā pūkoro o ngā rau o te nīkau te kāinga o te Hapalips. Ka taea te whakatū āhei kokoti rere hei hopu i ngā momo nei, ka taea rānei te tātari ngā rau popo. Hei kohikohi i ētahi atu momo, ka whaihua ake te āta tirotiro i ngā rākau, i ngā harore rānei e noho ana hei kāinga mō rātou.

Pērā i te maha tonu o ngā pītara i Aotearoa, he rerekore te nuinga o ngā Cryptodacne, ngā Loberus, me ngā Thallis, ā, me hīkoi haere rawa hei kimi kai mā rātou. Ki te takakinotia ō rātou ripoinga, ka roa tonu pea ngā taupori pītara nei e whakapau kaha ana kia mano, kia rea i ngā ngahere hou.

Translation by: Hēni Jacob, Huatau Consultants, Levin