Ētahi ākonga o te Kura Tuatahi o New Lynn, i Tāmaki-makau-rau ki te Uru, e whāwhā ana i te pūngāwerewere o Avondale, a Delena cancerides. He pūngāwerewere hura tēnei nō Ahitereiria. Nō ngā tau o ngā 1920 ka rarau tana noho ki te takiwā o Avondale, i Tāmaki-makau-rau. Whakaahua: nā Chris Hoult, Western Leader, 10 Here-turi-kōkā 2000.

Te kaupapa o tēnei pae tukutuku

Kua āta hangaia tēnei pae tukutuku mā ngā tamariki o ngā tau 2-6 i te kura tuatahi, tae atu ki ō rātou pouako. Kei konei:

• ētahi pārongo māmā nei te takoto mō ngā pepeke me ngā pūngāwerewere e kitea ana i Aotearoa
• ētahi pārongo whānui mō ngā pepeke me ngā pūngāwerewere, e hāngai ana ki te taumata 2 me te 3 o te wāhanga 'Ō Mataora' o te marautanga Pūtaiao.

He whakaahua anō kei te pae tukutuku nei o ētahi o ngā pūngāwerewere me ngā pepeke o Aotearoa. Whakamahia te whārangi hononga hei kimi i ētahi atu whakaahua. Ko te whārangi a Manaaki Whenua mō ngā Aitanga Tuarā-kore a Tāne te waharoa ki ngā whakaahua me ngā kōrero e pā ana ki ngā momo o roto i Te Aitanga Pepeke o Aotearoa (NZAC).

I whakatakotoria tuatahitia ngā kōrero nei mō ētahi kauhau ki ngā tamariki i ētahi kura tuatahi i ngā takiwā āhua rawa kore, i Tāmaki-makau-rau ki te Tonga me te Uru, e pā ana ki 'Ngā Aitanga a Punga'. Ko te pūtea tautoko nā te Tahua Hāpai i te Pūtaiao me te Hangarau, e tohaina ana e te Royal Society of New Zealand.

I homai rā taua pūtea hei whakapiki i te mōhio o ngā tamariki ki ngā pūngāwerewere, ki ngā pepeke, me ō rātou kāinga noho, hei whakapiki anō i te ngākau nui me te mārama ki ngā momo tūturu me ngā rauwiringa kaiao tūturu o Aotearoa. Ko tētahi 90% hoki o ngā pepeke me ngā pūngāwerewere o Aotearoa, kāore e kitea i ētahi atu whenua o te ao.

Me pēnei te tuhi tohutoro: Hall, G.; Hoare, R.J.B.; Crosby, T.K.; Jacob, H. 2004: Ngā pepeke me ngā pūngāwerewere o Aotearoa. www.LandcareResearch.co.nz/education/insects_spiders/maori/

© Manatārua Manaaki Whenua, 2004. E whakaaetia ana te tārua me te tohatoha i ngā pārongo nei ki tangata kē, kāore he raruraru, engari me whakamihi a Manaaki Whenua, me whakaatu anō te wāhi i kitea ai ngā pārongo. ā, kia tino kaua nei te tangata e whakamahia kia utu mō ngā kōrero nei, ki te kore tēnei āhua e whakaaetia ā-tuhi e Manaaki Whenua i te tuatahi.